Moi boas dende Guatemala!

Moi boas!

Son Rebeca Cuevas González e dende Guatemala, a 8.000 km de distancia do meu fogar, escríbovos a experiencia vivida nestes 10 días en terreo como voluntaria de Arquitectura Sen Fronteiras Galicia

A miña chegada ó país foi na tarde do xoves 7 de setembro á Cidade de Guatemala. Esa primeira noite houbo un terremoto de 7.2 na escala de Ritcher, o primeiro na miña vida. Sorte a miña que aínda que me atopaba nun 12º (nesas alturas nótase moito mais o movemento) estaba moi ben acompañada e todo transcorreu con tranquilidade.

Rebeca Cuevas

Os días seguintes aproveitei para coñecer un chisco a capital e a xente doutras organizacións que levan tempo traballando no país en diferentes ámbitos da cooperación.

O luns 11, xa de mañá, reunímonos o equipo en terreo de ASF (Lara, Adrián mais eu) coas contrapartes ASIAPRODI (Asociación Indígena Agropecuaria Pro-Desarrollo Integral) e FODHAP (Federación de Asociaciones y Organizaciones para el Desarrollo del Hábitat Popular). Nesta reunión falouse dos proxectos executados, os que están en marcha e os que comezarán nesta tempada. [En entradas posteriores explicarémosvos ben cales son e de que trata cada un deles] Nese mesmo día emprendemos a nosa viaxe en coche a cidade na que pasaremos estes meses de traballo, Retalhuleu, a 200 km da capital.

Os días seguintes da semana, xa en Retalhuleu, foron días de mais reunións, mudanza e readaptación a nova cidade, a nova cultura, o novo fogar e sobre todo o novo clima. Situada a uns 230 m sobre o nivel do mar, cunha temperatura media de 26,3ºC e unha humidade media do 70% ademais da choiva, posto que setembro e o mes con maiores precipitacións do ano.

PCR 2017

Na fin de semana aproveitamos para visitar Quetzaltenango, ou Xela na súa denominación indíxena, que é a segunda cidade mais importante do país. Moito mais fresquiña posto que está a 2380 m sobre o nivel do mar rodeada de varios volcáns. Nesta cidade tamén pasaremos algúns días destes meses posto que é a segunda base de ASF en Guatemala.

PCR 2017

Nesta segunda semana teremos as reunións coas comunidades para comezar as obras que se levarán a cabo na mellora do hábitat do municipio de Retalhuleu, así como o deseño da nova escola e das novas vivendas que comezan este ano.

Seguireivos contando nos próximos días como transcorre todo.
Unha aperta.

Guardar

Deixar unha resposta

This site uses Akismet to reduce spam. Learn how your comment data is processed.