Boas dende Reu!

Despois do traballo de oficina e xa c0s planos para o proxecto da escola de Victorias III impresos, desplazámonos á comunidade de El Rosario onde se están a construir as vivendas do proxecto de hábitat, acompañando a ASIAPRODI na supervisión das obras. Pasamos alí o día e almorzamos xunto ao representante comunitario.

 

 

Esa fin de semana a comunidade de San Miguel Las Pilas convidounos a almorzar co motivo das súas festas patronais e o aniversario da súa creación. Alí, asistimos ao partido de fútbol que se xogaba ese día. Por outra banda, tamén fomos convidados a acudir a unha ceremonia tradicional maya mam, guiada por Juventina compañeira de ASIAPRODI.

 

 

A semana seguinte viaxamos a Xela (Quetzaltenango), alí tivemos unha reunión co enxeñeiro e co mestre de obra do proxecto de educación (Victorias III). Ademáis, organizamos tamén unha reunión online co equipo de GT Internacional de Arquitectura Sen Fronteiras para poñernos ó día con todo o grupo que nos apoia dende Galicia.

Por outra banda estas dúas semanas ademáis de traballo de oficina e reunións de coordinación tivemos dúas grandes actividades vencelladas ao proxecto de hábitat.

Primeiro tivemos unha reunión, xunto a ASIAPRODI, co Consello de Autoridades que está formado por dous representantes, un home e una muller, das distintas comunidades da zona de Champerico. O Consello de Autoridades é o encargado de priorizar ás familias e ás comunidades beneficiarias dos proxectos.

Dentro do proxecto de hábitat vaise iniciar una nova liña de desenvolvemento que ten como finalidade a mellora do entorno domiciliar. Ao ser unha novidade é moi importante informar e debatir co Consello de Autoridades a posta en práctica e a estratexia a seguir e ademáis contar coa súa conformidade.

 

 

A segunda foi organizar e realizar un taller de formación sobre vivenda e entorno domiciliar saudable na comunidade de Montecristo. Ademáis, para explicar en que vai consistir esta nova liña de proxecto ás familias interesadas.

 

 

Esta semana comezamos viaxando a Victorias III (ao fin!) acompañando a ASIAPRODI para ter unha reunión de inicio de obra da escola para esta comunidade. Nesta, explicóuselle a tódolos membros da comunidade como vai ser o deseño da escola, presentouse o mestre de obra que se encargará da construcción, acordouse un cronograma e sinalouse a localización da escola na parcela. Tamén ensinóuselles a maqueta da escola a todos e todas, grandes e pequenos, e puideron ver, con moita emoción, a escola en pequeniño.

 

 

Ao tempo o mesmo día comezamos o proceso participativo, que estivemos a preparar as semanas anteriores, cos nenos e nenas da comunidade. Na seguinte entrada contarémosvos máis!

Un saúdo dende América!